Hver er afstaða stjórnmálaflokka til Karlaathvarfs?
Þann 8. nóvember 2024 sendi stjórn Karlaathvarfsins fyrirspurn til allra stjórnmálaflokka sem bjóða fram í kosningum til Alþingis að þessu sinni.
Spurt var um afstöðu flokkanna til eftirfarandi:
- Telur stjórnmálaflokkurinn að rétt sé að karlkyns þolendur ofbeldis hafi aðgang að sambærilegri þjónustu og kvenkyns þolendur ofbeldis?
- Telur stjórnmálaflokkurinn þörf á athvarfi fyrir karlmenn, í líkingu við þá þjónustu sem kvenkyns þolendur ganga að vísri?
- Mun flokkurinn beita sér fyrir því á Alþingi að karlkyns þolendur hafi aðgang að sambærilegri þjónustu og kvenkyns þolendur ofbeldis?
Þeir flokkar sem svöruðu voru eftirtaldir: Píratar, Miðflokkurinn, Lýðræðisflokkurinn og Sjálfstæðisflokkurinn.
Eins og staðan er í dag eru þolendur ofbeldis í mjög ójafnri stöðu eftir því hvort viðkomandi er karl eða kona. Karlmenn hafa ekkert athvarf til að leita til m.v. núverandi stöðu. Var staðan útskýrð í bréfi er fylgdi spurningunum.
Það er mikilvægt að heyra afstöðu stjórnmálaflokka, hvort þeir vilji og/eða ætli að bæta úr þeirri stöðu sem uppi er. Á sama tíma og það var svekkjandi að nokkrir flokkar sinntu því ekki að svara þessu mikilvæga erindi fyrir marga þolendur ofbeldis (en mættu svo á fund er sneru að ofbeldisumræðu kvennahreyfinga) þá var mjög jákvætt að í öllum þeim svörum sem bárust var nokkuð jákvæð “opinber” afstaða til að bæta úr því misrétti sem er í dag í aðstöðu fyrir kynin. Virðist því vera skilningur hið minnsta á því að rétt væri að karlmenn nyti sömu úrræða og konur.
Verður nú lauslega fjallað um afstöðu flokkanna sem svöruðu, í þeirri röð sem svör þeirra bárust:
Píratar:
Svar við því hvort karlmenn ættu að hafa kost á að leita í athvarf svipað og kvenkyns þolendum stendur til boða, var afgerandi frá Pírötum:
“Við teljum þörf á slíku athvarfi svo að karlkyns þolendur ofbeldis geti leitað skjóls.”
Og svar við þriðju spurningunni var eftirfarandi: “Flokkurinn mun beita sér fyrir því að athvarf fyrir karlkyns þolendur ofbeldis verði að veruleika.”
Miðflokkurinn:
Svör Miðflokksins voru jákvæð í garð félagasamtaka er taka að sér að sinna mikilvægum þjóðfélagslegum verkefnum. Þó komu ekki bein svör við spurningunum heldur var vísað til þess að flokkurinn vilji taka samtal við félagasamtök er sinna slíkum verkefnum:
“Miðflokkurinn telur að frjáls félagasamtök skipti miklu máli í lýðræðisþjóðfélagi og vill auðvelda þeim að starfa. Félög sem berjast fyrir bættum hag félagsmanna eða skjólstæðinga sinna geta verið mikilvægur farvegur fyrir umræðu, ábendingar og tillögur að bættu verklagi eða nýjum vinnubrögðum.”
Lýðræðisflokkurinn:
Svör hans voru hnitmiðuð en afgerandi. Svöruðu þeir spurningunum um hvort þörf væri á athvarfi og hvort flokkurinn myndi beita sér fyrir framgangi slíks verkefnis með orðinu “Já”.
Sjálfstæðisflokkurinn:
Svörin voru jákvæð en þó með formerkinu “ef” þörf sé á slíkri þjónustu fyrir karlmenn, þá myndi flokkurinn styðja slík mál. Ekki var um alveg afgerandi afstöðu að ræða, enda sett fram með einhverjum varnöglum (mögulega vegna skorts á upplýsingum):
“Líkt og áður sagði leggur Sjálfstæðisflokkurinn áherslu á jafnan rétt til þjónustu og úrræða fyrir alla einstaklinga, óháð kyni. Sjálfstæðisflokkurinn myndi því að öllum líkindum styðja mál sem miða að því að tryggja að karlkyns þolendur ofbeldis fái sambærilega þjónustu og kvenkyns þolendur.”
Við þökkum þeim flokkum sem svöruðu kærlega fyrir svör þeirra og vonum að þeir muni beita sér fyrir jafnri stöðu þolenda ofbeldis, óháð kyni þeirra. Algjör óvissa ríkir um afstöðu annarra flokka til þessa málefnis, sem er miður.